प्याखं

                                      - सौरभ शाक्य 

दबुली प्याखं क्यनाच्वन । दबू क्वय् स्वकुमिपिँ म्वः म्वः दु । च्वनां च्वनेथाय् मदु । दबू न्ह्यःने फ्यतुनाच्वंपिँ ,दबूं तापाक दनाच्वंपिँ घ्वातु घ्वाना दबू खने दयेकेत स्वयाच्वन । उखेँ थुखेँ छेँया फलय् ,दबू जखः फल्चाय् ,देगःसी मनूत धिपांसिपा च्वना दबू पाखे छ्यं ल्ह्वना ल्ह्वनाः स्वयाच्वन । दबुलिइ गुबलेँ प्याखं ल्हुगु क्यनी ,गुबले संबाद ल्हाःगु ! मिखा फुतियाये मलायेवं हे प्याखंया लु मेकथं हिली । स्वकुमित हाली -" ताल ग्वः ! सुर ग्वः न अभिनय ! न डाइलग त्याजी ! आउट आउट " थजाःगु सःया क्वलाहल लकस धुफ्वः दनाच्वन । 

तापाक च्वंपिसं दबुलिइ छु जूगु ! प्याखं क्यंगु ळा ! प्याखं म्वःत थःवं थः ल्वाःगु ! न संबाद त्याःजी न हाउभाउ , छुं छुं हे सिइके मफू , अय् सां मनूतयगु मिखा दबू पाखे सालाच्वन । दबुलिइ प्याखं म्वःतयसं ,स्वयाच्वंपिसं आउट आउट धाःगु नं च्यूताःमदु ,हाहु याःगु नं वास्ता मदु । स्वकुमिपिसं गोलभेरा , ध्वगीगु खेँयनं , भ्वाथः लाकामं क्ययेकेगु नं सुरु जुल । प्याखंम्वःतयसं कयेका हःगु न्हिलाःन्हिलाः त्याप्प त्याप्प लानाच्वन मानौँ थथे जूगु हे इमित न्ह्याइपूयाच्वन । शायद थ्वहे प्याखंया सफलता खनाःच्वन ला !

स्वकुमिपिँ यःकथं हाःथेँ हायेका , उमिसं नं उकथं हे प्याखं क्यनाच्वन , उकथं हे प्याखं ल्हुयाच्वन ।यक्वः थुकथं जुयेवं छम्हः प्याखंम्वः माइक ज्वनाःचिचाय् दना हाल -" थ्व प्याखं थथेहे खः थ्व प्याखं छगू देश खः देसय् थुकथं जुयाच्वंगु खःजिपिँ मू पात्र ,छिकपिँ कोरस पात्र , कलाकार छिकपिँ ,कलाकार जिपिँ , फुक्क फुक्कं लथालिङ , प्याखं भताभुङ । थ्व थौँया देशया अबस्था । थ्व प्याखं थुकथं क्वमचासेँ सिधइ ।" पर्दा ह्वारर तित ।